ஊரத் தெரிஞ்சுக்குவோம்..!!

                                                             

"அருக்காணி"

"அதாரு பேரு"  

"அது யாரு பேரும் இல்லீங்க, ஒரு ஊரு பேரு"

"என்னாதூ..!!"

"ஆமாங்க ‘கன்யாகுமரி மாவட்டத்துல’ இருக்கும் ஒரு ஊரோட

பேர் தான் அது"  

"இண்ட்ரஸ்ட்டா இருக்கே, மேலே சொல்லுங்க..!!"

"முக்காலி"

"என்னாங்க இது?? மேலே சொல்லுங்கன்னு சொன்னது தப்பா? அதுக்கு ஏங்க திட்டுறீங்க"  

“இல்லீங்க இதுவும் ஒரு ஊர் பெயர் தான்”

"நான் ஏதோ நாக்காலி மாதிரி உள்ளதுன்னு நெனச்சேன்"

"ஆமா அப்படியும் முக்காலின்னு உட்காரும் பொருளிருக்கு!!

"சரி மேலே சொல்லுங்க!"

“இந்த ஊர் கேரளா 'பாலக்காடு' மாவட்டத்தில் இருக்கு!!”

(இந்த ஊர் பெயரை கேட்டால் நிறையப் பேருக்கு தெரியல!!
ஆனாலும், நாம விட்டுட்டு போற  ரகமில்லையே!!) விபரம்
தெரிந்துகொள்ள ‘சைட்’டுக்கு போனா, அங்கே ஒரு நேஷனல்  
பார்க் இருக்கு!! Silent Valley National Park, Mukkali P.O, Palakkad, இந்தியா
டூரிஷம் டெவலப்மெண்ட் கண்ட்ரோலில் இருக்கு!!)
இங்கே போய் படிச்சு பாருங்க நிறையதெரிஞ்சுக்கலாம்!!) 
http://www.gatewayforindia.com/tourism/silent_valley.htm

சரி வாங்க அடுத்த ஊர பத்தி தெரிஞ்சுக்குவோம்!!

"கல்லெட்டும்கரா"

"இதென்னங்க புது கராவா  இருக்கு??" 

"ஆமாங்க இதுவும் ஒரு ஊர் பேர் தான், அதாவது கேரளாவுல
‘திருச்சூர்’ மாவட்டத்துல இருக்கு!!"

"அதெப்படி இந்த பேர்..!! அதுக்கும் ஒரு விளக்கம் வச்சிருப்பீங்களே?"

"இருக்கு சொல்றேன் கேட்டுங்க!! இந்த கரையில் நின்னுகிட்டு,
 ஒரு கல்லை எடுத்து வீசினால் தத்தி தத்தி 'ட்ட்ட்டட்ட்ட்' என்று   தண்ணியில் போகுமே (அதுக்கு பேரென்ன  தவளைக்கல்  விளையாட்டா??) அது மாதிரி  அக்கரையில் போய் விழும் வரை
உள்ள தூரம். அதற்கு பெயர் தான் "கல்லெட்டும்கரா"...

"அப்பாடா எப்படியெல்லாம் பேர் வைக்கிரைங்கய்யா?? நாமும்
தான் இருக்கமே ‘தேவூர்’னு பேர் வச்சுக்கிட்டு"

"பரவாயில்லையே நீங்களும் ஊர் விபரமெல்லாம் தெரிஞ்சு வச்சிருக்கீங்களே"

"பின்னே உங்களோட பேச ஆரம்பிச்சா ஃபிங்கர் டிப்ஸ்ல புள்ளி  விபரமா எடுத்து விடுவீங்க! நாமளும் ஒன்னு ரெண்டு  தெரிஞ்சு வச்சிருந்தாதான் கவுரதி!!....ஹி.. ஹி..   தப்பில்லையே"

"ஆமா உண்மை தான்.., அதென்ன ‘தேவூரு’"

"ஆமாங்க அப்படி ஒரு ஊர் பெயர் ‘நாகை மாவட்டத்தில்’ ஒன்றும், ‘சேலம் மாவட்டத்தில்’ ஒன்றும் இருக்கு"

"அப்படியா..வெரி குட்.. வெரி குட்... நல்லாச் சொன்னீங்க.."  

"வாரங்கள்!!"

"ஏன் மாதங்கள் இல்லையோ??"

"இல்லீங்க 'வாரங்கள்' (WARANGAL)  என்ற ஊர் + மாவட்டம் ‘ஆந்திர பிரதேசத்தில’  இருக்கு சார் அதை சொல்ல வந்தேன்"   

"அப்படியா??"

"என்னாதது  பேசிக்கிட்டே இருக்கும் போது ஆந்திராவுக்கு
போயிட்டீங்க?"

"ஆமா இங்கேயே கெடந்து உழன்று கிட்டிருக்காமா கொஞ்சம்
வெளி மாநிலத்தையும் தெரிஞ்சு வச்சிருக்கிறது நல்லது தானே!"

"சரி சரி சொல்லுங்க"

"(A.P) ஆந்திர பிரதேசத்தில  ஒரு 'நிஜாமாபாத்' இருப்பது போல,
(U.P) உத்தர பிரதேசத்தில  ஆஜம்கர்’ (AZAMGARH) மாவட்டத்திலும்  
ஒரு  'நிஜாமாபாத்' இருக்கு!!"

"ஓஹோ!!"

"என்ன ஓஹோ!! இன்னொன்னு கவனிங்க. நம்ப 'தேனி
மாவட்டத்துல'  ‘கம்பம்’னு ஒரு ஊர் இருக்கு தெரியுமா?"

"ஓ பேஷா தெரியுமே!!"

"அதுமாதிரி ‘ஆந்திர பிரதேசத்தில’ ‘கம்மம்’னு ஒரு ஊர் இருக்கு!!"

"அப்படீன்னா நானும் ஏதாச்சும் ஒன்னு சொல்லணுமே!!"

"சொல்லும்!"

"அடி அக்கா மங்களம்!"

"அடி ஆத்தி அது யாரது?"

"இதுவும் ஊர் பேர் தான்"

"இதென்னா அக்கா தங்கச்சின்னா?"  

"இல்ல சார்,.. ரயில் புறப்பட்டு போக ஆரம்பிச்சிடுச்சு. உடனே
தங்கச்சிக்காரி,  "அடி-அக்கா- மங்களம்  சீக்கிரம் வாடி..!" என்று
குரல் விட்டாளாம். ஓடி வந்த  அக்கா ஏறிய பிறகே ரயில்
புறப்பட்டு சென்றது என்றாலும், அதை கேட்டுக் கொண்டிருந்த 
ஊர்க் காரர்களில் சிலர், 'இது நல்லா இருக்கேன்னு'  அந்த
பெயரைச் சொல்லியே அழைக்க ஆரம்பிச்சுட்டாங்கலாம்.
நாளைடைவில் 'அடியக்கா மங்களம்' என்ற பெயரே நிலைத்து 
விட்டது!! "

"அது எங்க இருக்குன்னு சொல்லலியே?"

"திருவாரூர் மாவட்டத்துல!!"
                                                  
                                                 
                                       - இன்னும் தெரிந்து கொள்வோம்...!!

  

ஊரெல்லாம் ஊர்கள்...!!!

                                                                 
//ஆங்... நாகப்பட்டினம் மாவட்டத்தில 'சிக்கல்' ன்னு ஒரு ஊரு இருக்காமே அத விட்டுடீங்களே..//

சென்ற பதிவில் நான் எழுதிய ஊர் பெயர்களில் உள்ள சுவாரஸ்யங்களை படித்து விட்டு, எங்களின் நட்புள்ளங்கள் நிறைய பேர் இதை கேட்கிறார்கள்.

அவர்கள் கிண்டலுக்கு கேட்டார்களா? விவரம் தெரிந்து கொள்ள கேட்டார்களா?   தெரியலிங்க! ஆனாலும்  நம்ம  ஆராய்ச்சி
'மைண்ட்' இருக்கே (ஹி..ஹி..நம்மை நாமே பாராட்டிகிட்டா தான்
உண்டு.)  எல்லோரும் தெரிந்து கொள்ளவும், நாமும்  தெரிந்து 
(கொள்ளவும் / கொண்டும்) இங்கே வரைகிறேன்.

இப்ப எல்லோரும் தெரிஞ்சுங்க!

‘நாகை’ மாவட்டத்தில் ஒரு 'சிக்கல்' இருப்பது போல் ‘ராமநாதபுரம்’ மாவட்டத்தில் ஒரு 'சிக்கல்' இருக்கு. (இதைப் பற்றி எழுதினால்
‘சிக்கல்’ வந்துடுமோன்னு தான் எழுதல ( ஹி..ஹி..!! )

இந்த ஊர்களை சுற்றி இருக்கும் ஊர் பெயர்களை கவனியுங்கள்.
"மஞ்சக்கொல்லை",  "கூத்தூர்",  "வேட்டைக்காரன் இருப்பு"
"தலைஞாயிறு"  பெயர்கள் எப்படி?? (அவைகள் எல்லாமே நாகை மாவட்டத்தில் வருகிறது) "வாழ்க்கை",  "வாழ வந்தான்"  இப்படி
பெயர் கொண்ட ஊர்களும் ..!! (இவைகள் திருவாரூர் மாவட்டத்தில் வருகின்றன)

அது போலவே -

'ஏர்வாடி' என்ற ஊர் பெயர் ‘திருநெல்வேலி’ மாவட்டத்தில் ஒன்னு இருக்கு, ‘ராமநாதபுரம்’ மாவட்டத்தில் ஒன்னும் இருக்கு. (அந்த 'ஏர்வாடி’யில் என்ன இருக்குன்னு உங்களுக்கு தெரியும்னு நினைக்கிறேன். இந்த ‘ஏர்வாடி’யில் என்ன விசேஷம் என்று எனக்கு தெரியலைங்க!)

‘திருநெல்வேலி’ மாவட்டத்தில் ஒரு 'குற்றாலம்' போல், ‘நாகை’ மாவட்டத்தில் ஒரு 'குத்தாலம்' இருக்கு. இந்த ‘குத்தாலத்தில்’ “அந்த” குற்றாலம் மாதிரி எந்த விசேஷமும் கிடையாது.

"பாளையம்கோட்டை" என்ற ஊர் ‘திருநெல்வேலி’ மாவட்டத்தில் மட்டுமில்லை, ‘கடலூர்’ மாவட்டத்திலும் ஒன்னு இருக்கு.
(அதில் ஃபேமஸ் ஜெயில், இதில் என்னவென்று தெரியல!)

"தமிழ் நாட்டில்" ஒரு 'வேலூர்' இருப்பது போல், (கேரளா)
'கோட்டயத்திலும்' ஒரு 'வேலூர்' இருக்கு. (இங்கே ஜெயில்
ஃபேமஸ் போல, அங்கே என்னவென்று தெரியல!)

"மேலூர்" என்ற ஊர் ‘மதுரை’ மாவட்டத்தில் ஒன்றும் ‘தூத்துக்குடி’ மாவட்டத்தில் ஒன்றும் ‘விழுப்புரம்’ மாவட்டத்தில் ஒன்றும்,
'திருவள்ளூர்' மாவட்டத்திலும் ஒன்றும் இருக்கு .

"வடகரை" என்ற ஊர் ‘நாகை’ மாவட்டத்தில் ஒன்றும்,
'திருவாரூர்’ மாவட்டத்தில் ஒன்றும், ‘சிவகங்கை’ மாவட்டத்தில்
ஒன்றும், ‘திருநெல்வேலி' மாவட்டத்தில் ஒன்றும், (கேரளா)
“பாலக்காட்டில்” ‘வடகரா’ என்ற பெயரிலும் இருக்கு!!

"சாத்தனூர்" என்ற ஊர் ‘நாகை’ மாவட்டத்தில் ஒன்றும், (கேரளா) ‘கொல்லம்’ (Quilon) மாவட்டத்தில் ஒன்றும் இருக்கு.

"திருபுவனம்" என்ற ஊர் பெயர் (பட்டுப் புடவைக்கு ஃபேமஸ்)
‘தஞ்சை’ மாவட்டத்தில் ஒன்றும், ‘சிவகங்கை’ மாவட்டத்தில்
ஒன்றும் இருக்கு.

"திருமுல்லை வாசல்" என்ற ஊர் ‘நாகை’ மாவட்டத்தில் இருப்பது போல் ‘சென்னையில்’ "திருமுல்லை வாயில்" என்று ஒரு ஊர் இருக்கு !!

“திருப்பத்தூர்” என்ற ஊர் ‘சிவகங்கை’ மாவட்டத்தில் ஒன்றும் ‘வேலூர்’ மாவட்டத்தில் ஒன்றும் இருக்கு.

"முதுகுளத்தூர்" என்ற ஊர் ‘மதுரை’ மாவட்டத்தில் ஒன்றும், ‘ராமநாதபுரம்’ மாவட்டத்தில் ஒன்னும் இருக்கு.

"வளையப்பட்டி" என்ற ஊர் ‘நாமக்கல்’ மாவட்டத்தில் ஒன்றும், ‘மதுரை’ மாவட்டத்தில் ஒன்றும் இருக்கு.

"ஆலங்குடி" என்ற ஊர் 'திருவாரூர்' மாவட்டத்தில்
ஒன்றும், ‘புதுக்கோட்டை’ மாவட்டத்தில் ஒன்றும் இருக்கு.

‘அரியலூர்’ முன்பு ‘பெரம்பலூர்’ மாவட்டத்தில் இணைந்திருந்தது. தற்பொழுது ‘அரியலூர்’ தனி மாவட்டமானாலும், ‘அரியலூர்’ என்ற ஊர் ‘விழுப்புரம்’ மாவட்டத்தில் ஒன்றும் இருக்கு!

"அத்தானி" என்ற ஊர் 'ஈரோடு' மாவட்டத்தில் ஒன்றும்,
'புதுக்கோட்டை' மாவட்டத்தில் ஒன்றும், (கேரளா) 'திருச்சூர்'
மாவட்டத்தில் ஒன்றும், (கேரளா) 'எர்ணாகுளம் ' மாவட்டத்தில்
ஒன்றும், (கர்நாடகா) 'பெல்காம்' மாவட்டத்தில் ஒன்றும் இருக்கு.

'கொத்தமங்கலம்'  என்ற ஊர் 'புதுக்கோட்டை' மாவட்டத்தில் இருப்பது போல், (கேரளா) 'எர்ணாகுளம்' மாவட்டத்தில்  "கோதமங்கலம்" என்ற ஊர் இருக்கு! ஆங்கிலத்தில் இரண்டு ஊருக்குமே (KOTHAMANGALAM) என்றே குறிப்பிடப் பட்டுள்ளது கவனத்தில் கொள்ள வேண்டும்.

'புதுக்கோட்டை' மாவட்டத்தில் அறந்தாங்கிக்கு அருகிலுள்ள
ஊரின் பெயரை கேட்டால் சிரிப்பு வரும். "கொக்கு முட்டை"
அதேபோல அறந்தாங்கிக்கு அருகில் இருக்கும் மற்றொரு
ஊரின் பெயர் "ஆளப்பிறந்தான்".

(கேரளா) 'எர்ணாகுளத்தில்' 'மட்டன்சேரி' என்ற ஒரு ஊர் இருக்கு. அது எந்த வகை 'மட்டன்' என்று நமக்கு தெரியாதுங்க!

‘கேரளாவில்’ "இடுக்கி" என்று ஒரு மாவட்டமிருக்கு. (இதில் யார் யாரை தூக்கி இடுப்பில் “இடுக்கி”க் கொள்வார்கள் என்று நமக்கு தெரியாதுங்க!!)

(கேரளா) ‘கொல்லத்தில்’ "புனலூர்" என்ற ஊர் இருக்கு. (இது நாம யூஸ் பண்ணும் 'புனல்' அல்ல!!)

(கேரளா) கோட்டயத்தில் "நாலு கோடி" என்று ஒரு ஊர் இருக்கு!!

'திருநெல்வேலி'  மாவட்டத்தில் ஒரு ஊரின் பெயர்  'படுக்க பத்து!'

(கேரளா) "பத்தனம்திட்டா" மாவட்டத்தில் ஒரு ஊரின் பெயர் "தடியூர்" (இங்கே யாரும் மெல்லிசாக இருக்க மாட்டாங்களோ?)

"கங்கை கொண்டான்", "கடாரம் கொண்டான்", "எப்போதும் வென்றான்" இவைகள் எல்லாமே ஊர்கள் பேர் தாங்க!!

'சென்னையில்' "சாலி கிராமம்" இருப்பது போல், 'சிவகங்கை' மாவட்டத்தில் "சாலை கிராமம்" என்ற ஊர் இருக்கு!

இப்படி இரண்டு, மூன்று, நான்கு மாவட்டங்களில் ஒரே ஊர்களின்
பெயர்கள் இருப்பது போல்......

                                                                                     இன்னுமிருக்கு .....!!

                                                                 

சுவாரஸ்யங்கள் என்பது....!!!

                                                                               

சுவாரஸ்யங்கள் என்பது...மனதிலிருந்து பொங்கி பிரவாகமாய் வருவது தானே!  சுணக்கமாய் இருக்கும் போது மூச்சை உள் இழுத்து மெது மெதுவாய் வெளியே விட்டு மனதை சுறுசுறுப்பாக்கி கொள்ளணும். அப்படி செய்தால் அலை அலை என பொங்கும் சந்தோசத்திற்கு அளவே இருக்காது. SO, நீங்க ஃபிரெஷ்ஷா ஆயிட்டீங்களா?? வாங்க..,,

கேரளாவில் உள்ள "பத்தனம்திட்டா" மாவட்டத்தில் "வளஞ்ச வட்டம்" என்று ஒரு ஊர் இருக்கிறது. இங்கிருந்து பணம் அனுப்ப வரும் நபரிடம் " வட்டம் வளைந்து" தானே இருக்கும். பின்னே எப்படி அந்த ஊருக்கு அப்படி பேர் வந்தது? என்று கேட்டால் அவருக்கு சொல்லத் தெரியவில்லை.

உங்களில் யாருக்கேனும் தெரியுமா? (ஜமால் சார்!! நீங்க ‘அதிரை’யில் பிறந்தாலும், கோட்டயத்திலா இருக்கீங்க!! இப்படியே வந்து சத்தம் போடாம படிச்சிட்டு போனா எப்படி?? விவரம் சொல்லலாம்ல. கேப்போம்ல!! )

கேரளாவில் பெரும்பாலான வீடுகளுக்கு டோர் நம்பர் கிடையாது. சமீபத்தில் தான் திருவனந்தபுரம் சிட்டியில் கூட டோர் நம்பர் கொடுக்க ஆரம்பித்திருக்கிறார்கள். வீட்டின் பெயர், ஊரின் பெயர், மாவட்டம் பெயர் இருந்தாலே போதும் போஸ்டல் டிபார்ட்மென்ட் இலகுவாய் கொண்டு போய் சேர்ப்பித்து விடுகிறது.

காலிகட் (கோழிக்கோடு) மாவட்டத்திலிருந்து ஒரு நபர் பணம் அனுப்ப வருவார். அவர் வீட்டின் பெயர் "நூறு ஏக்கரில் வீடு" (வேலை பார்ப்பதோ எண்ணூறு ரியால் சம்பளத்துக்கு!!) "நூறு ஏக்கரில் வீட்டை வைத்துக் கொண்டு, எதுக்கு இங்கே வேலைக்கு வந்தாய்” என்று கேட்டால், அந்த ஆள் சிரிக்கிறார்.

இன்னொரு வீட்டின் பெயர் "வீடு வில்ல வீடு" (என்னங்க இது??)

திருவனந்தபுரத்தில் இன்னொரு ஊரின் பெயர் "நெய் யாற்றின் கரா" (neyyattinkara) (தேனும் பாலும் ஆறா ஓடும்னு கேள்வி பட்டிருக்கிறோம். இங்க நெய்யா ஓடும் போல..!!) இளையராஜா சார் கூட ஒரு பாட்டில் இந்த ஊர் பெயரை சொல்லி பாடுவார்.

இன்னொரு ஊரின் பெயர் "சிறையின் கீழ்" (chirayinkil) நான் கூட நினைத்துக் கொள்வதுண்டு. உயரமான இடத்தில் ஜெயில் இருக்கும், அதுக்கு கீழே ஊர் இருக்கும் போல!! இல்லையாம். தண்ணீரை சிறை பிடித்து வைத்திருப்பதால் (அணைக்கட்டு) அந்த பெயராம். (என்னங்கடாது... !!)

இன்னும் நம்ம கன்யாகுமரி மாவட்டத்தில் பார்த்தீர்கள் என்றால் ஊர் பெயர்களே சுவாரஸ்யமாய் இருக்கும்.

"அஞ்சு கிராமம்" (‘ஒரு’ கிராமத்தையே நம்மால் சமாளிக்க முடியலே! இதுலே அஞ்சு கிராமமா?? ஸ்டீபன் என்னாதிது??)

"கருங்கல்" (ஊர் பெயர் தாங்க..!!)

திங்கள் மார்க்கெட், புதன் மார்க்கெட், வெள்ளி மார்க்கெட் இப்படி நாட்கள் பெயர்களிலேயே ஊர்கள் பெயரும். அத்தனையும் சந்தைகள் கூடும் நாள்.

நாகை மாவட்டத்தில் “பூந்தோட்டம்” என்று ஒரு ஊர். சுற்றி பார்த்தீர்கள் என்றால் வெறும் “கருவக்காடா” இருக்கும். இப்ப அவைகள் சரி செய்யப்பட்டிருந்தால், பிளாட்கள் போட்டு விற்பனையாகிக் கொண்டிருக்கும்.

“மயிலாடுதுறை” யில் ஒரு ‘மயில்’ கூட ஆடி நான் பார்த்ததில்லை (அப்ப எதுக்கு அந்த பேர் - ஊர் காரங்க தெரிந்தா சொல்லுங்க!!)

விட்டா... (action packed) மாதிரி, சுவாரஸ்யம் packed என்று சொல்லிக்கிட்டே போவீங்களோ??!!

கேக்குது.. கேக்குது..

நீங்க சொல்வது கேக்குதுங்க!!

அதனால... ??

அதனால என்னவா??

நீங்க "எஸ்" ஆகிடுங்க!!!

நாங்க கமெண்ட்ஸ் பக்கம் போறோம்.

ஹி.. ஹி.. இப்படியும் (வோட்டும், கமெண்ட்ஸும்) போட சொல்வோம்ல !!