உயிர் போகும் வழி!!

சிரிப்பூ..
இந்த சிரிப்பு இருக்கிறதே உங்களுள் பூவாகி புன்னகையாகி சந்தோஷமாகி, உங்களை எப்போதும் மகிழ்ச்சியாக வைத்திருக்கும். ஆகவே புன்னகையை எப்போதும் உங்கள் முகத்தில் பொக்கிஷமாய் சேமித்து வையுங்கள். அதை கொண்டு எதை வேண்டுமானாலும் உட்கார்ந்த இடத்தில் இருந்தே சாதித்துக் கொள்ளலாம். ஆம்.. நீங்கள் நினைக்கிற மாதிரி எல்லாமே.

நான் இப்ப சொல்ல வர்றது அதைப் பற்றியல்ல.

எங்களின் நிறுவனதிற்காக இன்னொரு I T நிறுவனத்திலிருந்து பணி செய்ய வருபவர் தான் டேனியல் வர்கிஸ் அவரை எப்போதும் "வர்கிஸ் - வர்கிஸ்" என்று தான் அழைப்பார்கள். என்ன பெயர் சுருக்கமோ என்னமோ எனக்கு இந்த மாதிரி எல்லாம் கூப்பிட பிடிக்காது. முழுப் பெயர் சொல்லி அழைத்தால் தான் திருப்தி.

இந்த வர்கிஸ் இருக்கிறாரே மகா புத்திசாலி. எப்போதும் பேசுவதை பேசிக்கொண்டு சிரிப்பாய் முகத்தை வைத்துக் கொண்டு காரியமே கண்ணா இருப்பார். அவர் ஆபீசில் வந்து உட்கார்ந்து வேலைப் பார்க்க ஆரம்பித்தாலே பூப்பூத்துக் குலுங்குவது போலிருக்கும். அப்படியாப்பட்ட கனிவு, எல்லாம் தெரிந்தும் ஒரு பணிவு. கம்பியூட்டரின் விவரம் தெரியாதவர்களை கிட்ட அழைத்து பொறுமையாய் விளக்கி விளங்க வைப்பது இவரது ஸ்பெசாலிட்டி. கம்பியூட்டரில் என்ன ட்ரபுள் வைரஸ் இன்ன பிற வஸ்துகள் புகுந்தாலும் இவர் கை வைத்தால் குப்பைத் தொட்டி தான் அதற்கு வசிப்பிடம்.

இப்படி கல கலப்பாய் சுறு சுறுப்பாய் வந்து போய்க்கொண்டிருந்த வர்கிஸ் ஸீ யூ சொல்லி விட்டுப் போனவர் தான், மறு நாள் I C U வில் இருப்பதாக செய்தி வந்த பின்னர் தான் என்னாச்சு... ஆமாம் நீங்கள் நினைக்கிற மாதிரி தான் நாங்களும் பரிதவித்து கேட்டோம்.
                                                                                           

 





எந்த ஹாஸ்பிடலில் இருக்கிறார், என்ன ட்ரீட்மெண்ட் கொடுக்கிறார்கள் எதுவுமே தெரியவில்லை. தெரிந்தால் மட்டும் என்ன செய்து விட முடியும். பிரே பண்ணுவதை தவிர... ஒரு நாள் ரெண்டு நாளல்ல மூன்று மாதங்கள் ஓட்டமாய் ஓடிப்போனது தெரியவில்லை.

எல்லோரும் அவரவர் வேலையை கவனித்துக் கொண்டிருக்கும் போது அன்று மலர்ச்சியாய் பளிச்சென்று ஆபீசுக்குள் நுழைந்தார் வர்கிஸ், ஆபீஸ் அல்லோல கல்லோலலப் பட்டது, ஆளாள் அவரை இழுத்தணைத்து முத்த மிட்டு கரிசனையாய் விசாரிப்பும், பாசமான அரவணைப் புமாய்.. எல்லோருக்கும் சந்தோசம்.

ஆனாலும் ஏன்.. என்ன.. எப்படியானது கேட்க ஆவல் தான் எனக்கு. ஏதும் நினைப்பாரோ? இருந்தாலும் நிலைக் கொள்ளாமல் கேட்டே விட்டேன்.

அதைப் பற்றி டேனியல் வர்கிஸ் நம்மோடு ..

மூன்று இடத்தில் நான் உயிர் பிழைத்து வந்திருக்கிறேன் என்று மெல்ல சொல்ல ஆரம்பித்தார்

அன்று இங்கே வந்து உங்களை எல்லாம் பார்த்து விட்டு
வீட்டுக்கு போகும் வழியில் ஒரு நண்பரையும் பார்த்து விட்டு போகும் போது தான், தலை பாரமாய் மயக்கம் வருவது போல் உணர்ந்தேன். காரின் வேகத்தை சட்டென்று குறைத்து ஓரமாய் நிறுத்திவிட்டு, உடனே ஹாஸ்பிடலுக்கு போன் செய்து என் கார் நிற்குமிடத்தையும், எனது நிலையையும் விவரித்தேன். அதே போல் என் மனைவிக்கும், அவள் பதறாமல் எப்படி எல்லாம் வார்த்தையால் மெழுக முடியுமோ அப்படியோர் பதவிசாகப் பேசினேன். அவள் பதிலுக்கு காத்திராமல் கட் பண்ணினேன். ஆம்புலன்ஸ் என் இருக்குமிடம் தேடி பறந்து வந்து என்னை அள்ளிப் போட்டுக் கொண்டு ஹாஸ்பிடல் விரைந்தது.

என்னை ஸ்கேன் மற்றும் எல்லா டெஸ்டும் எடுத்து “ப்ரைனில் நீர்க் கட்டிக்கொண்டு” இருப்பது தெரிய வந்து உடனே ஆபரேஷன் பண்ணனும் இல்லாவிட்டால் என்று உயிருக்கு விலைப் பேசிக் கொண்டிருந்தார்கள். இந் நிலையில் கேரண்டீ கையெழுத்து போடனுமாமே,, யார்ப் போடுவார்கள். ஒருவர் முகத்தை ஒருவர் பார்த்துக் கொண்டிருந்தனர்.

அப்ப தான் முன் வந்தார் Dr.அஹமது இப்ராஹீம். அவரை எனக்கு முன்பே தெரியும் என்று கையெழுத்தும் போட்டு ஆபரேஷன் ரூமுக்கும் அழைத்துப் போனது தான் எனக்கு தெரியும். கண்விழித்து பார்க்கும் போதும் யாரையும் எனக்கு தெரியலை! தலையில் சின்னதா ஒரு ஆபரேஷன் சார். எல்லாம் மறந்து போச்சு.

கொஞ்சம் கொஞ்சமாய்..அந்த தெரபி, கொஞ்சம் கொஞ்சமாய்...இந்த தெரபி என்று என் நினைவுகளை கொடுக்கக் கொடுக்க பத்து நாள் சென்ற பின்னரே என் மனைவியின் முகம் நினைவில் வர ஆரம்பித்தது. எல்லார் முகமும், அவர்களோடு பேசியது பழகியது நினைவுக்கு கொண்டு வர ஒரு மாதத்திற்கு மேலாகிப் போனது என்று விவரித்துக் கொண்டே போனார்.

நாங்கள் பிரமிப்பாய் அவரையே பார்த்துக் கொண்டிருந்தோம். என்ன மனிதர் இவர்..!!

எனக்கு முதலில் மயக்கம் வந்த போதே நான் சுதாரிப்பு இல்லாமல் நான் ஓட்டிப் போன கார் எங்காவது மோதி ஆக்சிடென்ட்டாகி இருந்தாலும் அப்போதே போயிருப்பேன். இரண்டாவது கேரண்டீ கையெழுத்துப் போட ஆளில்லா விட்டாலும் போய் சேர்ந்திருப்பேன். எனக்கு எந்த ஞாபகமும் வராமல் போயிருந்தாலும் முழுமையாய் நான் போன மாதிரி தானே, என்றார். உண்மைதானே!

யாருக்கு வரும் அந்த துணிச்சல். தைரியம் என்றால் என்ன என்பதை டேனியல் வர்கிஸ் நமக்கு சொல்லாமல் சொல்லிவிட்டார்!